Facebook Nunphung (9)

Facebook Nunphung (9)

Salai Joseph KB Thawng

Laica le Laiholh hmanh ṭhaṭhi in kan thiam lo bu i miphundang holh in status update kan ṭhawn ngai tawnmi hi cu kan ituak pah ngai a hau cang. Hiti ti tikah, miphundang holh in update loding, miphundang holh thiam/cawn/hman loding, ti duhnak asilo. Kanmah kan nu holh (mother's tongue) asimi Laiholh le ca hna daithlang tuk in ṭial le hman, uar lo (hei thiam lo chapbei) hi mah le mah zei irel lo phunkhat asi---zei ka silo iti tluk zong asi (a thiambik mi tu cu kan um lo).

Ralkap cozah nih kanmah ramte ah cawnnak nawl an kan peek lo hleihlei ah, kanmah lila nih thiam kan itim lo, thiam duhnak thinlung zong kan ngei lo. Cafang fonh (combination) kongah nihin tiang kan idang cio ko. Asinain, zeitipoah in, a awchuah khawhnak paoh in kan ṭial peng, daithlang in kan ṭial peng ahcun Laiholh lawng kan thiam te lai---Laica kan thlau te lai.

"Kan hawikom (friend list) ah miphundang an um len caah, miphundang holh in kan status kan update tawn" anti pah len. Mah hna pawl ca post mi kha ka zoh/rel ziar tawn i an hawile miphundang nih an comment in an like mi hi cheuhra ah cheukhat hmanh asi hui lo---zeihme asi hnga?

Catial timi cu pumpak isel in thangchiat (personal constraint) in tial asilo, tiah ka chim pah lengmang---keimah pumpak zong kai ton/pah tawn ve ko. Ka biaki ning ah miphundang ca taar loding post loding kha asilo. Ralkap cozah nih cawnnak nawl an hei kan peek lo hlei i thiam kan itimh lomi, miphundang ca kan tial vial i ralring ngai in kan tial tawn i Laica bel daithlang in hei tial---hei thiam lo chapbei, Laica dawtu pakhat dirhmun in mit an kem pah ko. A zungzal in post/update kha ka soi zungzal. Facebook hi mino caah cun Laica cawnnak bak asi, ka hei ti ko---cawnnak hmun/nawl peek lo pei kan si fam. Cheukhat i miphundang ca an post mi cu keimah ABC lawng a thiammi hmanh nih ka luthak pah tawn J . Laica le holh a thiammi nih a caancaan i miphundang ca an hun vei khi cu apoi ah an ruat cio lai lo dah (?). Thiamlo hlei i thiam zong itimh lo, miphundang ca le sining lawng uar peng hi cu apoi ko. Miphundang holh in an post/update mi zongah anmah miphundang nih an hun buatsaih mi ka hmu lo. Kan zatlangnun hi a kaupi cio ko lai nain a zatawk theih deuh a hau.

Miphundang ram ah khuasa tampi kan um. A zungzal in Laica ṭial le update khawh asi lai lo, a fiang. Mirang, Kawl tbk. in update a herh caan a um ko lai. Amah belte a zatawk kan theih deuh a hau. Laica le Holh hmanh thiam huaha lo i miphundang ca le holh uar tuk hi cu mahhngallo deuh kan si pah rua. Aṭhalo, kan hrial deuh a hau. Laica le Laiholh thiam usih. Miphundang ca le holh zong thiam usih! Cutin, kan holh le ca kilveng in cawisang usih---kan himnak asi lai.