Ramdang Phan Fale Sin Cakuat (3)

Ramdang Phan Fale Sin Cakuat (3)

Dear nute le pate,

Na dam ṭha maw? Thawngpang kan itheih lo a sau ko. Kei belte ka dam ṭuangṭaang. Nizaan ahkhan Pirte nih ngahring a ka dawih le an ka huutpiak i ka hung cakvak deuh ngai. Na nu belte cu ihkhun he ai daw cuahmah ko. Damlei a panh ruam lo. Nikhat hnu nikhat a zor cuahmah. Siidin awk tehmanh cu kan damhpiak kholo. Kan ar zong kan huut dih cang. Chiarkhuan khongkhat le pichuur/pivulh pakhat telawng kan nganh/tanh.

Aw, ka fa, phaisa kuat cu chim lo, a chawnh tehmanh cu na kan chawn lo le kan hnabei a dong ko. Phaisa tampi kuat nakin ka nu le pa, zeidah nan lawh, khuasak tintuk ah nan changchia tuk maw, ti vial thawnghal te khi kan duhbik ko. Na awkaa theih te cu pei kan duhbik ko cu. Na nu le pa kan tar cang, zeihmanh kan ṭhahnem ti lo, an heutu, an liautu si zong kan itim lo. Kanmah dongh in kan dong te ko lai. Amah belte, thawnghal na daithlang deuh. Kan awkaa theilo in mual kan in liamtak sual ahcun…

Vei aw ka fa, ramdang phan Laimi thawngpang kan theih pah hruphrap lengmang. Kannih te khua ṭheo, biadik maw an chim, biasi dek an phai. Chantiluan an dawinak ah Laimi sinak lungput an kaltak deng cang, ti hrawnghrang. Ekhah, bialak ah, naite ahkhan Zankung (Yangon) in Cirte a hung tlung le aze…cu ngai hni tawi le angki hngawng kauh cu, a hnuk lang luklak ko cu teh. Vai Lian pu, nih “Kan Cirte hi hnilo angkilo zong in pei a tlonlen ngam te lai hi” a ti phah cuh! Nan chantiluan dawi ngai hi! Nan oh tuk, chantiluan nan dawi kholo tuk, nan kan ti le, e ne ko, kan in ti tawn hna. Asinain aih, a leer deuh ko rua.

Cheukhat cu hlawhhlang, ai zuarmi hna an um, ti hna dawh kan theih cuh! Biachokvai maw asi, biaṭhuto dek asi, hngal ve hlah! Aze…cu bang hna cu si taktak sehlaw…um. Bialo, zudin lawng hi sual ah ruat lai ci luau. Pathian nih an peekmi na pum, na miphun, na nunphung le na holh le ca hna zeirello, daithlang in hman, tehna zong hi sual phunkhat dakaw asi, tiah. Ka fa, hun isuum tuungmaang! Khuakhing hun khak deuh uauh!

Feibuk (facebook), nan ti maw, zei buk nan ti hme, aih, inṭhaneu nan ti rua. Cu bang hna ahcun ningzak hmanthlak hna an taar huar lengmang, an ti hui. Inṭhaneu ah mihrokhrol an tam tuk, an ti hoi khah, von iralring awh. Ka fa, nangmah hna na si ve sual maw, tu hi! Doi Kil nih a pale a chawnh hna le feibuk ah i buk cu nuam tuk si, a ti rua ka ti. Nang zong hi inṭhaneu ah i nue tuk ve dawh na si. “Ka pa, inṭhaneu le feibuk cu hawilekom i pehtlaihnak pei asi ko cu” na rak ka ti nain atu ning ahcun na lornak le na ruutreunak asi deuh rua hih.

Ekhah, ka philh deng cuh! Tukum cu Vaicung Tlaunak Lopil kan samh. Atu hi hawi cu a thual dih na, a vaat dih na, an si. Kannih belte a vaattu zong kan um lo. Ka fa, lovahnak te tal cu hun ka zuampiak law ka duh. Na ti khawh ngengaw lo hrat zong le naamtong le hreitlung cawknak tal hun ka zuampiak law ka duh ko. Tin Dun pu naamtong le hreitlung ka hlang cawk ti lo, a hmaikhah zong silo. Nai lebang a naamtong ka beuhpiak le a hmai ka hei khah loning.

Khah, ka bia a sau. Vei aw, ramdang ahhin phaisa hi a ruh in nan ruh lai, tiah kan ruat bal lo. Ka fa, phaisa tampi kuat kan in hau lo hi awh! Na nu le pa thawnghal lengmang belte a hauh in kan in hauh. Chantiluan kan dawi, ti cu nan si fam le a hmun le caan cu pei a si fam cu aw. Zeitirai si hlah, nanmah maw sual kan in phawt deuh hna hnga, chantiluan dek. Zeikhom si ah, inṭhaneu ahcun tlawmte hun iring deuh ko sawh. Cun, na si khawh ikpak ahcun naamtong le hreitlung cawknak tal cu hun ka vei te aw!

Mangṭha tuk khah.

Na pa

Lairam